Kiçik və Orta Biznesin İnkişafı Agentliyinin (KOBİA) təşkilatçılığı və müvafiq dövlət qurumlarının iştirakı ilə Gəncə və Yevlaxda sahibkarlarla görüşlər keçirilib.
Yevlax rayonunda istehsal və emal sahəsində fəaliyyət göstərən sahibkarların iştirakı ilə keçirilən görüşdə aidiyyəti dövlət qurumlarının nümayəndələri tərəfindən investisiya təşviqi sənədi, KOB subyektlərinin maliyyə resurslarına çıxışı, müvəkkil banklar tərəfindən sahibkarlıq fəaliyyəti üçün verilən biznes və güzəştli kreditlər, kreditlərin sənədləşdirilməsi, subsidiyaların qeydiyyata alınması barədə biznes subyektlərinə məlumat verilib, onların sualları cavablandırılıb.
Gəncə şəhərində isə sənaye, turizm, kənd təsərrüfatı məhsullarının emalı sahəsində fəaliyyət göstərən sahibkarlıq subyektlərinin maliyyə resurslarına çıxışı ilə bağlı çətinliklərinin öyrənilməsinə dair görüş keçirilib. Görüşdə 40-a yaxın sahibkarlıq subyekti, o cümlədən Gəncə Şəhər İcra Hakimiyyətinin, İqtisadiyyat Nazirliyinin Sahibkarlığın İnkişafı Fondunun və digər müvafiq qurumların nümayəndələri iştirak ediblər. Tədbirdə mövzu ilə bağlı sahibkarlıq subyektlərinin təklifləri dinlənilib, onlar dövlət dəstəyi mexanizmləri, güzəştli kreditlərdən istifadə, KOBİA-nın dəstək və xidmətləri barədə məlumatlandırılıb.
Powered by Froala Editor
