Xan Sarayı ilə birlikdə Şəkinin tarixi mərkəzinin UNESCO-nun Ümumdünya İrs Siyahısına daxil olunması ilə bağlı sertifikatın təqdimolunma mərasimi keçirilib.

Dövlət Turizm Agentliyinin təşkilatçılığı ilə keçirilmiş tədbirdə Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov Şəkinin böyük turizm imkanlarının bölgədə fəaliyyət göstərən KOB subyektləri və potensial sahibkarlar üçün əlavə üstünlüklər yaratdığını vurğulayıb. Qeyd edilib ki, turizm sahəsində sahibkarlığın təşviq olunması KOBİA-nın fəaliyyət istiqamətlərindəndir və turizm yönümlü startap ideyası olan KOB-lar "Startap" şəhadətnaməsi almaq, eləcə də daxili bazar araşdırmasının aparılmasına maliyyə dəstəyinin göstərilməsi üçün KOBİA-ya müraciət edə bilərlər. Agentliyin Şəki şəhərində "KOB Dostu" və KOB İnkişaf Mərkəzi (KOBİM) fəaliyyət göstərir ki, onlar yeni KOB-ların yaranmasına və mövcud sahibkarların inkişafına, KOB-ların maraqlarının müdafiəsinə, dövlət dəstəyi mexanizmləri barədə sahibkarların məlumatlandırılmasına dəstək olur, biznes sahəsində bilik və bacarıqların artırılması üçün məsləhət və təlim xidmətləri göstərir.

Powered by Froala Editor