Mil-Muğan iqtisadi rayonu üzrə sayca 3-cü, ölkə üzrə isə 46-cı KOB dostu ofisi fəaliyyətə başlayıb. 

Biznesin qurulmasına və inkişafına yerində hərtərəfli dəstək göstərən KOB dostlarının sayı Mil-Muğan iqtisadi rayonu üzrə 3-ə çatıb. Sayca 3-cü KOB dostu ofisi Beyləqan rayonunda fəaliyyətə başlayıb. Kiçik və Orta Biznesin İnkişafı Agentliyinin (KOBİA) və Beyləqan Rayon İcra Hakimiyyətinin təşkilatçılığı, bölgədə sahibkarlara xidmət göstərən dövlət qurumlarının nümayəndələrinin və sahibkarların iştirakı ilə Beyləqan KOB dostu rayonun biznes ictimaiyyətinə təqdim edilib. 

KOBİA-nın İdarə Heyətinin sədri Orxan Məmmədov Agentliyin fəaliyyəti və KOB dostu mexanizmi barədə məlumat verib. Qeyd olunub ki, hazırda respublikanın 46 şəhər və rayonunda KOB dostu ofisləri fəaliyyət göstərir. KOB dostu Beyləqanda və ətraf rayonlarda biznesə başlamaq və sahibkarlıq fəaliyyətini genişləndirmək istəyən biznes subyektlərinə mövcud dövlət dəstəyi mexanizmləri, o cümlədən Agentliyin xidmətləri çərçivəsində zəruri dəstəyi təmin edəcək. KOB dostu rayonda yeni biznes subyektlərinin yaranması, sahibkarların qanuni maraqlarının müdafiəsi, onların investisiya təşəbbüslərinin reallaşdırılması istiqamətində müvafiq tədbirlər görəcək. KOBİA sədri mikro, kiçik və orta biznes subyektlərini KOB dostu ilə fəal əməkdaşlığa dəvət edib.

Beyləqan Rayon İcra Hakimiyyətinin başçısı Asif Ağayev rayonda sahibkarlığın inkişafı istiqamətində görülən işlərdən danışıb, KOB dostunun fəaliyyətinin rayonda mikro, kiçik və orta sahibkarlığın inkişafında, yeni bizneslərin yaranmasında əhəmiyyətli olacağını bildirib.

Tədbir çərçivəsində sahibkarların qarşılaşdıqları çətinliklər və təklifləri dinlənilib, rayonda biznes fəaliyyətinə dair fikir mübadiləsi aparılıb. 

Həmçinin tədbirdə KOB dostu mexanizmi, KOBİA-nın mikro və kiçik sahibkarlara göstərdiyi dəstək barədə filmlər nümayiş olunub. 

Tədbir iştirakçıları Beyləqan Gənclər Mərkəzində yerləşən KOB dostu ofisində sahibkarlara dəstək və xidmətlərin göstərilməsi üçün yaradılmış şəraitlə də tanış olublar. 

Beyləqan rayonuna səfər çərçivəsində KOBİA nümayəndələri “Qarabağ Taxıl” MMC-də dənli bitkilərin qurudulması, təmizlənməsi və saxlanması prosesi ilə tanış olub, sahibkarla biznes ehtiyaclarına dair fikir mübadiləsi aparıblar. Məlumat üçün qeyd edək ki, müəssisə 2012-ci ildən fəaliyyət göstərir. 200-dən çox daimi işçinin çalışdığı müəssisə ildə 20 min tondan çox dənli bitkilər istehsal etmək gücünə malikdir.

Powered by Froala Editor