Azərbaycan Respublikasının Kiçik və Orta Biznesin İnkişafı Agentliyinin (KOBİA) nümayəndələri 2-5 iyun tarixlərində Sankt-Peterburqda keçirilən 24-cü Sankt-Peterburq Beynəlxalq İqtisadi Forumunda iştirak edir. 

KOBİA-nın İdarə Heyətinin sədri Orxan Məmmədov forum çərçivəsində Ümumrusiya Kiçik və Orta Sahibkarlıq Təşkilatı – “Opora Rosii” tərəfindən təşkil olunmuş “Ali təhsil müəssisələrində gənc sahibkarlıq: biznes birliklərinə dəstək” mövzusunda paneldə çıxış edib. Qeyd olunub ki, sahibkar düşüncə tərzinin formalaşdırılmasında təhsil müəssisələrinin də rolu böyükdür. Agentlik xüsusilə gənclər arasında sahibkarlıq fəaliyyətinin təşviqinə böyük önəm verir və bu istiqamətdə müxtəlif tədbirlər həyata keçirir, ali təhsil müəssisələri ilə sıx əməkdaşlıq edir. KOBİA-nın qrant, “Startap” şəhadətnaməsinin verilməsi, ödənişsiz təlim və məsləhət xidmətlərinin göstərilməsi kimi dəstək mexanizmləri həm də gənclərin sahibkarlıq fəaliyyətinə cəlb olunmasına, onların biznes fəaliyyətinin inkişafına yönəldilib.

Forum çərçivəsində KOBİA sədri Ümumrusiya Kiçik və Orta Sahibkarlıq Təşkilatının – “Opora Rosii”nın prezidenti Aleksandr Kalinin ilə əməkdaşlığın genişləndirilməsi imkanlarına dair fikir mübadiləsi aparıb. 

XXIV Beynəlxalq İqtisadi Forumu iyunun 5-dək davam edəcəkdir. 

Powered by Froala Editor