Dekabrın 5-də Beynəlxalq Könüllülər Günü münasibətilə “Azərbaycan Könüllülərinin IV Həmrəylik Forumu” keçirilib. 20 könüllü təşkilatının 1000-dən çox fəal üzvünün iştirak etdiyi tədbirdə Kiçik və Orta Biznesin İnkişafı Agentliyinin (KOBİA) “KOB könüllüləri” də iştirak ediblər.
Forumdan əvvəl könüllülər Fəxri Xiyabanda Ümummilli Lider Heydər Əliyevin xatirəsini yad edib, məzarı önünə gül dəstələri qoyublar. Şəhidlər Xiyabanını da ziyarət edən könüllülər Azərbaycanın ərazi bütövlüyü uğrunda canlarından keçmiş şəhidlərimizin xatirəsi dərin ehtiramla yad ediblər.
Bakı Konqres Mərkəzində keçirilmiş Forum çərçivəsində çıxışlar edilib, könüllü təşkilatlarının sərgisi keçirilib. “KOB könüllüləri”nin də müvafiq stendlə təmsil olunduğu sərgi çərçivəsində könüllülər üçün əyləncəli və intellektual oyunlar keçirilib, könüllülərin təşəbbüsü ilə kiçik fleşmoblar təşkil olunub.
Forum çərçivəsində həmçinin, 5 nominasiya üzrə könüllülük fəaliyyəti üzrə fərqlənmiş gənclər təltif edilib.
Powered by Froala Editor
