Bizneslərdə ESG prinsiplərinin tətbiqi istehsal xərclərinin azalması, rəqabət qabiliyyətinin yüksəldilməsi, ixrac potensialının artırılması və xarici investisiyaların cəlb edilməsi baxımından faydalıdır.
Biznes mühiti və beynəlxalq reytinqlər üzrə Komissiyanın Kiçik və Orta Biznesin İnkişafı Agentliyinin (KOBİA) rəhbərlik etdiyi “Korporativ idarəetmə, investisiyalar və korporativ sosial məsuliyyət” işçi qrupunun Ekoloji, sosial və korporativ idarəetmə (ESG) standartları üzrə alt-qrupunun 2025-ci il üzrə Yol Xəritəsində ESG standartları ilə bağlı ictimai məlumatlılığın artırılması və standartın tətbiqinin genişləndirilməsi nəzərdə tutulur.
Bu məqsədlə KOBİA-nın təşkilatçılığı ilə ESG standartları üzrə məlumatlandırıcı seminar keçirilib.
Onlayn seminarda sahibkarlar, eləcə də bölgələrdə ESG standartları barədə biznes subyektlərinin məlumatlandırılması üçün Agentliyin regionlardakı nümayəndələri – KOB dostları iştirak ediblər.
Tədbirdə KOBİA və Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinin tabeliyində olan Azərbaycan Standartlaşdırma İnstitutu (AZSTAND) tərəfindən ESG üzrə milli standartın məzmunu və biznes üçün faydası barədə məlumat verilib. Qeyd olunub ki, ESG üzrə milli standart KOBİA-nın təşəbbüsü ilə Beynəlxalq Standartlaşdırma Təşkilatının (ISO) tövsiyələrinə əsasən hazırlanıb və AZSTAND tərəfindən qəbul olunub. “AZS IWA 48:2024 “Ətraf mühit, sosial və korporativ idarəetmə (ESG) prinsiplərinin tətbiqi üzrə çərçivə” dövlət standartı müəssisə və təşkilatlarda ESG prinsiplərini tətbiq etməklə müasir biznes mühitində dayanıqlı inkişafı dəstəkləmək və sosial məsuliyyəti təşviq etmək üçün çərçivə təqdim edir. Beynəlxalq təcrübəyə əsaslanaraq hazırlanmış standartın məqsədi müəssisə və təşkilatlara ESG strategiyalarını formalaşdırmaqda və həyata keçirməkdə kömək etməkdir. Bu standartın tətbiqi dövlət və özəl sektorda dayanıqlı inkişafı dəstəkləməklə yanaşı, müştəri məmnuniyyətinin və sosial məsuliyyətin artırılmasına, risklərin azalmasına öz töhfəsini verəcək. Standartın tətbiqi könüllü xarakter daşıyır. Bizneslərin ESG prinsiplərinə riayət etməsi biznes proseslərinin optimallaşmasına, istehsal xərclərinin azaldılmasına, rəqabət qabiliyyətinin yüksəldilməsinə, ixrac potensialının artırılmasına və xüsusilə, xarici investisiyaların cəlb edilməsinə imkan verir. İnvestorlar sərmayə ilə bağlı qərarlar verən zaman ESG prinsiplərinin tətbiq olunmasına üstünlük verirlər.
Sonda seminar iştirakçılarını maraqlandıran suallar cavablandırılıb.
Powered by Froala Editor
