Startap müsabiqəsinin qaliblərinə biznes planlarının reallaşdırılması üçün pul mükafatı təqdim edilib.
Startaplara dəstək məqsədilə Kiçik və Orta Biznesin İnkişafı Agentliyinin (KOBİA) tərəfdaşlığı ilə “AccessBank” QSC tərəfindən həyata keçirilən “Bizdən Biznesə” startap müsabiqəsinin qalibləri açıqlanıb.
Oktyabr ayında elan olunmuş müsabiqəyə startaplar və sahibkarlar tərəfindən bir ay ərzində 500-dən çox müraciət daxil olub. Münsiflər heyəti tərəfindən təqdim olunmuş layihələr arasından innovativ, kreativ, davamlılıq və gəlirlilik meyarlarına cavab verən 3 layihə qalib olaraq seçilib. I yerin sahibi “Climasel” soyutma panelləri istehsalı layihəsinin müəllifi Xəyalə Miriyeva, II yerin sahibi kənd təsərrüfatı və qida tullantılarının bioloji emaldan keçirərək alternativ heyvan mənşəli protein və yağ əlavələrinin istehsalı layihəsinin müəllifi Rafiq Mirzəyev, III yerin sahibi isə arı mumlu örtüklərin istehsalı layihəsinin müəllifi Fidan Əlisoy olub.
“Bizdən Biznesə” startap müsabiqəsinin yekunlarına və qaliblərin mükafatlandırılmasına həsr olunmuş tədbirdə çıxış edən KOBİA-nın İdarə Heyətinin sədri Orxan Məmmədov və “AccessBank”ın İdarə Heyətinin sədri Davit Tsiklauri ölkəmizdə startap ekosistemi, yeni biznes ideyaların və innovativ layihələrin reallaşdırılmasına dövlət dəstəyi tədbirləri və güzəştlər, eləcə də bu sahədə dövlət-özəl əməkdaşlığı, özəl sektorun startaplara dəstəyi barədə fikirlərini bölüşüblər. Qeyd olunub ki, belə layihələr innovativ həllərin yaranmasına, startap layihələrinin inkişafına və yeni ideyaların biznesə çevrilməsinə öz töhfəsini verir.
Sonra biznes planın həyata keçirilməsi üçün “AccessBank” tərəfindən I yerin sahibinə 25000 manat, II yerin qalibinə 20000 manat və III yerin sahibinə 15000 manat həcmində mükafat təqdim edilib. Qaliblər mükafatı yalnız nağdsız hesablaşma formasında istifadə edə biləcəklər. Bundan başqa, qaliblər bir il ərzində “AccessBank” vasitəsilə ölkə daxilində aparılan bütün bank əməliyyatları üzrə komissiya ödənişlərindən azad edilib.
Powered by Froala Editor
